Kryeministri i Republikës së Kosovës, Albin Kurti ka reaguar pas aksionin të sotëm të Policisë së Kosovës kundër krimit e kontrabandës në Prishtinë, Pejë dhe në veri e jug të Mitrovicës.
Ai në një postim në Facebook ka thënë se këto veprime policore janë paraprirë nga hetimet intensive dhe janë me urdhër e të bashkërenduara me prokuroritë dhe gjykatat kompetente.
“Aksion i Policisë kundër krimit e kontrabandës në Prishtinë, Pejë dhe në veri e jug të Mitrovicës
Herët në mëngjesin e sotëm, Policia e Kosovës, me qëllim të luftimit të kontrabandës ka filluar operacione bastisjeje në disa lokacione të ndryshme në Prishtinë, Pejë e Mitrovicë (si në jug ashtu edhe në veri).
Këto veprime policore janë paraprirë nga hetimet intensive dhe janë me urdhër e të bashkërenduara me prokuroritë dhe gjykatat kompetente. Janë sekuestruar mallra e dëshmi të tjera që paraqesin edhe prova materiale”, shkruan Kryeministri Kurti.
Ai thekson se Krimi dhe grupet kriminale nuk do të tolerohen dhe do të luftohen.
“Kontrabandën do ta luftojmë e do ta parandalojmë. Aksioni i sotëm policor ka përfunduar. U bëj thirrje qytetarëve në komunën veriore të Mitrovicës që të mos bien pre e disa medieve në Serbi që e mbrojnë krimin, korrupsionin dhe kontrabandën dhe duan ta politizojnë dhe etnizojnë atë”, përfundoi kryeministri
Kryeministri Kurti jep detaje për aksionin kundër kontrabandës, ka një mesazh për qytetarët e Mitrovicës së veriut
