NËSE
Nëse
kemi folur për dashurinë
-është rritur
Nëse
kemi shkruar për dashurinë
-është zbukuruar
Nëse
kemi përqafuar dashurinë
-na ka dhuruar ngjyrën e saj
Nëse
kemi qarë për dashurinë
-na i ka fshirë lotët.
DARDANIA
Ecën
me shikimin tonë
heton
hapat tanë
mbi kurrizin e saj
fle
me gjumin tonë
Dardania varr i madh
i stinëve.
TOKA JONË
Toka jonë
ka pirë gjak tonin
i ka ujitur
fidanet në qiell
TOKA JONË.
QENI PA GJUMË
Sonte
Xhufin tim
s’e merr gjumi
në kopsht shumë hije
qeni leh në hije
këto rrinë prapa pemëve
të mos i shohë askush
u merr erë
u afrohet t’i kafshojë
hijet me shumë këmbë.
mars, 1999
NGJYRAT E LOTIT TË NËNËS
Të hënën
loti ka ngjyrën e bardhë
të martën loti ka ngjyrën e kuqe
Të mërkurën
e ka ngjyrën e zezë
Të enjten
e ka ngjyrën e kaltër
Të premten
e ka ngjyrën e gjelbërtë
Të shtunën
e ka ngjyrën e kaftë
Të dielën
e ka ngjyrën e Kosovës
maj, 1999
LIRIKA E PLAGOSUR
Herë dënes
herë vajton
herë pikëllohet
herë qan
herë kërruset
herë ecën me kukëza
herë i shihen lotët
herë kapet për shtylla kaltrie.
ESHTRAT TANË FLASIN
Kudo
eshtrat tanë
kur
ecin mbi ta
lëvizin
gjëmojnë
i afrohen njëri-tjetrit
në Ballkan
(edhe gjetiu)
eshtrat tanë
e thërrasin
njëri-tjetrin
eshtrat tanë të shkapërderdhur
në dashurinë tonë
flasin me Kosovën.
SHIRAT PËRTEJ KOHËVE
Rrugë e gjatë e shirave
shirat takohen
shirat flasin
shihen përtej kohëve
zëri i lotëve prek lartësitë
nis vajin dita e plagosur në zemër
rruga
zëri
dhe dita
shihen në pasqyrë qielli
ju dua zogj
-hapni dritare
në shi
në kohë
dhe në dashuri
shirat përtej kohëve
xherdan i stinëve të etura
i stolisin ishujt e dhembjes
me shikim gjelbërimi
dashuria jonë
dy aorta
dy paralele
në shira përtej kohëve
në det të mërzisë
shirat flasin
me diell, me yje në kopshte pikëllimi
Perëndimi fole mërgimi.
MOTRA SHKODËR
Motër Shkodër
sytë t’i shohim
në kodër
ti e sheh veten në Drin
sa të kemi afër
edhe yjet e din’
sytë e tu kopsht
shikimi yt gjelbërim
me vete të kemi pasur edhe në mërgim
Shkodër motër
e dashurisë votër.
DITA TEATËR
Sot
dita është
teatër i madh
pikëllimi
dekor
stinët
aktor’
kori i zogjve
prolog i tragjedisë moderne.