Festa e Birrës në Korçë po shënon suksese të jashtëzakonshme, dhe nata e tretë nuk bëri përjashtim. Qytetarë dhe turistë të shumtë, vendas e të huaj, u mblodhën për të shijuar një mbrëmje të paharrueshme nën tingujt e muzikës dhe aromën e gatimeve tradicionale, gjithçka e shoqëruar nga freskia e Birrës Korça.
Një nga risitë më të mëdha të kësaj feste ishte “GOLD by Korça,” varianti më i ri në treg, i cili theu rekorde shitjesh. Kjo birrë e re ka fituar zemrat e pjesëmarrësve me shijen e saj të rafinuar dhe cilësinë e lartë, duke u bërë zgjedhja e parë për shumë prej tyre.
Vizitorët u ndanë në dy pika kryesore: Shtëpia e Birrës Korça dhe terminali i autobusëve, ku atmosfera ishte e ngrohtë dhe mikpritëse. Shtëpia e Birrës mirëpriti një numër të madh vizitorësh, përfshirë shqiptarë që jetojnë jashtë vendit, nga Italia dhe Greqia, por edhe nga çdo cep i Shqipërisë.
Të gjithë, nga vizitorët e parë deri tek ata që janë rikthyer çdo natë, shprehën kënaqësinë e tyre për atmosferën e veçantë dhe shijen unike të Birrës Korça. “Jemi shumë të kënaqur, si nga atmosfera ashtu edhe nga shija që ofron Birra Korça,” thanë disa nga vizitorët në Shtëpinë e Birrës, duke reflektuar emocionet e përgjithshme të të pranishmëve.
Festa e Birrës Korça vazhdon të jetë një pikë referimi për argëtim, shije dhe traditë, dhe “GOLD by Korça” duket se do të vazhdojë të jetë një yll në rritje në këtë festë madhështore.
(BalkanWeb)