Më 17 tetor 2025, në sheshin “Skënderbeu” në Tiranë, do të mbahet një protestë mbarëkombëtare në mbështetje të luftës së Ushtrisë Çlirimtare të Kosovës (UÇK) dhe për të kërkuar drejtësi për ish-krerët e saj që po përballen me drejtësinë në Gjykatën Speciale në Hagë.
Kjo protestë është thirrur dhe organizuar nga Organizata e Veteranëve të Luftës së UÇK-së (OVL-UÇK), ndërsa mbështetja për të është rritur në mënyrë të ndjeshme në ditët e fundit si në Kosovë, ashtu edhe në Shqipëri.
Në një konferencë për media, kryetari i OVL-UÇK-së, Hysni Gucati, tha se interesimi i qytetarëve për të marrë pjesë në protestë ka qenë shumë i madh.
“Protesta në Tiranë do të jetë një mesazh i fuqishëm për drejtësinë ndërkombëtare dhe për ata që po përpiqen të njollosin luftën e pastër të Ushtrisë Çlirimtare të Kosovës. Kemi gjetur mbështetje të jashtëzakonshme nga qytetarët, por edhe nga institucionet në Shqipëri. Tashmë është e konfirmuar edhe pjesëmarrja e kryeministrit Edi Rama në protestë,” – deklaroi Gucati.
Kush ka shprehur interesim për pjesëmarrje?
Kryeministri i Shqipërisë, Edi Rama, e ka konfirmuar pjesëmarrjen në protestë, duke e cilësuar atë si një akt solidariteti me të drejtën e luftës së popullit të Kosovës.
Qindra qytetarë nga të gjitha anët e Kosovës janë regjistruar për të udhëtuar me mbi 60 autobusë të organizuar, ndërkohë që pritet që shumë të tjerë të udhëtojnë me automjete private.
Përfaqësues të shoqërisë civile, ish-pjesëtarë të UÇK-së, familjarë të të akuzuarve në Hagë, si dhe figura publike të njohura kanë shprehur gjithashtu mbështetjen për protestën.
Institucione në Shqipëri, përfshirë autoritete vendore dhe përfaqësues të partive të ndryshme politike, kanë dhënë dritën jeshile për protestën dhe kanë ofruar mbështetje logjistike.
Konteksti i protestës
Protesta e 17 tetorit në Tiranë vjen pas dy protestave të mëdha të organizuara më parë në Prishtinë dhe Hagë, ku mijëra qytetarë kërkuan lirimin dhe drejtësinë për ish-krerët e UÇK-së: Hashim Thaçi, Kadri Veseli, Jakup Krasniqi dhe Rexhep Selimi, të cilët ndodhen në paraburgim që nga nëntori i vitit 2020, nën akuza për krime lufte dhe krime kundër njerëzimit.
Organizatorët thonë se protesta në Tiranë synon të unifikojë zërin shqiptar në mbrojtje të luftës çlirimtare, duke kërkuar nga institucionet ndërkombëtare që të garantojnë një gjykim të drejtë dhe të paanshëm.
“Kjo është më shumë sesa një protestë. Është një bashkim i shpirtit shqiptar përballë padrejtësisë dhe një përkujtim për sakrificën e mijëra luftëtarëve që dhanë gjithçka për lirinë që sot gëzojmë,” – theksoi Hysni Gucati.
Veterani i Ushtrisë Çlirimtare të Kosovës, Agim Pllashniku të mërkurën është nisu në mëngjes në këmbë nga sheshi “Zahir Pajaziti” në Prishtinë drejt sheshit “Adem Jashari” në Tiranë.
Këtë rrugëtim, Pllashniku po e ndërmerr në shenjë nderimi dhe mbështetjeje për luftën e drejtë të UÇK-së, si dhe në protestë ndaj padrejtësive që po u bëhen ish-drejtuesve të UÇK-së që po mbahen në Hagë.
Veteranëve të Ushtrisë Çlirimtare të Kosovës i është siguruar transporti për në protestën e 17 tetorit që mbahet në Tiranë për ish-udhëheqësit e UÇK-së.
Lajmin e ka bërë të ditur kryetari aktual i Prishtinës, Përparim Rama, përmes një njoftimi zyrtar.
“Sot kam nënshkruar vendimin për të siguruar transportin për veteranët e Ushtrisë Çlirimtare të Kosovës, që do të marrin pjesë në protestën gjithëkombëtare më 17 tetor në Tiranë. Veteranët tanë nuk janë pjesë vetëm e së kaluarës por janë pjesë e ndërgjegjes sonë kombëtare dhe Prishtina, si kryeqytet i Kosovës, do të mbetet shembull i respektit institucional, i kulturës politike dhe i mirënjohjes publike”, shkroi Rama.
Masa të larta sigurie dhe organizim i gjerë
Burime nga Policia e Shtetit në Shqipëri bëjnë të ditur se për protestën janë paraparë masa të shtuara sigurie, si dhe planifikim i rrjedhës së trafikut në Tiranë për të mundësuar zhvillimin e qetë të tubimit. Organizatorët kanë garantuar se protesta do të jetë paqësore dhe demokratike, duke respektuar ligjin dhe rendin publik.