W.SHAKESPEARE
MOS KULLONI VIRGJËRESHA SI KRUA
Mos kulloni virgjëresha si krua,
Pse meshkujt gjithnjë mashtrojnë,
Se tradhëtinë e kanë në thua
Dhe fjalës s`i qëndrojnë.
Nga “Shume zhurme per asgje”, Akti II, skena III
EZRA POUND
“Marrëveshje”
Po bëj një marrëveshje me ju Uolt Uitman:
Të kam urryer gjatë.
Po vij te ju si një adoleshent
Që ka patur një baba kokëderr.
Thinjat më mësojnë si të zë miq.
Krahët e tu e rrëzuan atë lis
Për ta krasitur unë më vonë.
Jemi gatuar nga i njëjti brumë:
Të bëhemi që të dy gjetje fjale.
- Tagore
GJYKATËSI
Thoni për të çfarë të dëshironi, por unë i njoh dobësitë
e fëmijës tim.
Nuk e dua pse është i mirë, por sepse është i vogli im.
E si do ta dini sa vlera ka kur përpiqeni të vini në një kandar meritat kundrejt të metave?
Kur më duhet ta ndëshkoj ai bëhet edhe më shumë i imi.
Kur bëhem shkak për lotët e tij më qan zemra bashkë me të.
Vetëm unë kam të drejtë ta fajsoj dhe ndëshkoj,
sepse ai vetëm mund t`u prish gjumin atyre që e duan.
Jack Prelutsky
GËZOHU QË HUNDËN E KE NË FYTYRË
Gëzohu që hundën ti e ke në fytyrë
dhe jo të ngjitur atje ku s`rri mirë,
se po të ishte në vendin ku s`ka punë
me hundën do mërziteshe shumë.
Sikur mos ta kishe hundën ku e ke,
sanduiç midis gishtave të këmbës të qe
kënaqësi s`do të ishte ndonjëherë
që këmbëve 24 orë t`u merrje erë.
Kjo hunda jetën si do t`ua nxinte
sikur në majë të kokës këmbëkryq të rrinte,
kënaqësia do të ishte krejt e huaj
kur qimet të gudulisnin hundën tuaj.
Sikur brenda veshit hunda të qe
eja merre vesh cdo të bëhej atje,
në çastin që teshtima do dilte e thellë
ai veshi juaj do ushtonte si shpellë.
Por hunda rri ku është elegante vërtet,
rri e nuk luan nga vendi i vet,
në tjetër vend ajo nuk rri mirë:
gëzohu , o fatlum që e ke në fytyrë!
- B. Yeats
PËRGJËRUAR TË VISHET ME TISIN E QIELLIT
Të kisha pëlhurat e zbukuruara të qiejve
Të qëndisura me shndritje ari dhe argjendi,
Pëlhurat e kaltra, të zbehta, të errëta
Të territ, të dritës dhe mugëtirës,
T`i shtroja si qilim nën këmbët e tua:
Por jam i varfër dhe kam vetëm ëndrra;
Shtrirë i kam ato nën këmbët e tua;
Shkel butë, e dashur, se “shkel” mbi mua.
Robert Burns
DASHURIA IME
Trëndafilja ime veshur me të kuqe
Shpërthen në petale Prill e Maj;
Një melodi unë po ta qëndis
Të bëjë bota be: për kok` të saj.
Sa je e bukur Ti, o Bukuri
Në dashuri që mbetet
Kaq do ndjehem unë kur t`ju pi
Si të kem pirë detet.
Derisa detet të thahen, e dashur
Dhe shkëmbinjtë të shkrijnë në diell
Unë do t`ju dua, o e shtrenjtë,
Lart do t`ju ngre, në qiell.
Dhe lamtumirë ty, e vetmja ime!
Dhe lamtumirë vetëm për pak!
Me ty jam unë gjithnjë, e dashur
Dhe afër, edhe larg.
Hilaire Belloc
ELEFANTI
Kur njerëzit elefantin sjellin ndërmend
E çojnë habinë gjer te retë,
Me një bisht pas që s`kërkon vend
Dhe feçkë para sa një planet.
Carl Sandburg
NËN NJË SHTYLLË TELEFONI
Jam një tel bakri i nderur në ajër,
I hollë sa mezi bëj në diell një vizë hije.
24 orë nuk pushoj – gumëzhij si zgjua një këngë:
Është dashuri, luftë dhe para, përpjekje
dhe lot, është puna dhe nevoja,
Vdekja dhe e qeshura e burrave dhe grave që kalojnë
nëpër mua – hamall i të folurës suaj,
Në shi dhe mjegull kulloj,
Në diellin shëtitës lindje-perëndim
rri i thatë,
Një tel bakri.
Siegfried Sassoon
VETËVRASJE NË TRANSHE
Vetë e kam njohur nën armë një djalosh
Që u zgërdhi me jetën në gëzimin bosh,
Dremiti i braktisur në errësirë,
Laureshës i fishkëllente që pa gdhirë.
Në transhetë akull, i dëshpëruar shumë
Me shpërthime, morra dhe pa rum
Kokës së vet ia futi një.
Për ushtarin askush nuk foli më.
Ju turma të kënaqura me syrin zjarr
Që i brohorisni djemtë kur shkojnë ushtar,
Ktheheni në shtëpi pa e ditur njëherë
E qeshura dhe rinia ku shkojnë, në ç`ferr.
Robert Pinsky
KËNGË SAMURAI
Kur nuk kisha çati bëra
Guximin çatinë time. Kur nuk
Kisha darkë darkova sytë e mi.
Kur nuk kisha sy unë dëgjova.
Kur nuk kisha veshë unë mendova.
Kur nuk kisha mendim unë prita.
Kur nuk kisha baba bëra
Kujdesin babain tim. Kur nuk kisha
Nënë përqafova rregullin.
Kur s`e kisha një mik bëra
Heshtjen mikun tim. Kur nuk kisha
Armik u ballafaqova me kurmin tim.
Kur nuk kisha faltore bëra zërin tim
Faltoren time. Nuk e kam një
Prift, gjuha ime është kori im.
Kur nuk kam asnjë mundësi
Fati është mundësia ime. Kur mos
Të kem asgjë vdekja do të jetë fati im.
Nevoja është taktika ime, pavarësia
Është strategjia ime. Kur s`e kisha
Një të dashur iu fala gjumit.
Mary Elizabeth Frye
MOS RRI TË QASH MBI VARRIN TIM
Mos rri të qash mbi varrin tim,
Unë s`jam në gjumë, jam në zgjim.
Jam era që pa rreshtur fryn,
Mbi dëborë diamanti që ndrin.
Grurit i jap pjekje si drita e diellit,
Në vjeshtë jam loti i madh i qiellit.
Kur në mëngjez ta kesh një zgjim
Vij si vrrulli i zogjve në fluturim,
Që i ngjitet qiellit lart,
Jam ylli që ndrin nëpër natë.
Mos rri mbi mua të qash me zë,
Unë s`jam në varr, nuk vdiqa gjë.
Miller Williams
KAFSHËT
Mendoj se vdekja e kafshëve shtëpiake
shënon ndryshime të madha në jetën tonë.
Mendo si ishin gjërat kur ato ishin ndryshe.
Ishte një kafshë atëherë, një qen apo një mace,
jo ajo që ti ke tani, një tjetër.
Mendo kur gjërat ishin ndryshe para asaj.
Ishte tjetër gjë atëherë. Ju gati e kishit harruar fare.
Robert Bly
SILLEM VONË ME MAKINË TË POSTOJ NJË LETËR
Natë e ftohtë me flokë dëbore. Rruga sonte fare e shkretë.
Të vetmit në lëvizje janë flokët e bardhë në pështjellim.
Ngre kapakun e kutisë postare dhe ndiej të ftohtin e hekurit.
E kërkoj vetminë e kësaj nate në shoqërinë e dëborës.
Me duar në timon le të më fluturojnë minutat.
Emily Dickinson
NËSE NJË ZEMRE QARJEN IA NDALOJ
Nëse një zemre qarjen ia ndaloj
Nuk do jetoj më kot;
Nëse një jete brengën ia largoj,
Apo pushoj dhimbje të fortë,
Nëse e bëj një të vetmuar
Të lumtur prapë në botë:
Nuk do jetoj më kot!
Sylvia Plath
PASQYRË
Jam prej argjendi dhe kërkuese. Nuk kam paragjykime.
Gjithçka shoh e gëlltit menjëherë
ashtu siç është, pa ngarkesë dashurie a mospëlqimi.
S`jam fare mizore, vetëm e çiltër,
syri i një zoti të vogël, katërkëndësh.
Më të shumtën e kohës meditoj për murin përballë. Ai është rozë, me pikla. E kam parë aq gjatë
sa tani ka zënë vend brenda meje. Por shndrit.
Fytyrat dhe errësira na ndajnë gjithnjë e më shumë.
Tani jam liqen. Një grua përkulet mbi mua,
duke kërkuar në botën time për çfarë është realisht.
Pastaj u kthehet atyre mashtruesve, qirinjve apo hënës.
Shikoj shpinën e saj dhe ia pasqyroj besnikërisht.
Ajo ma shpërblen me lot dhe një tundje të duarve.
Jam e rëndësishme për të. Ajo bën ecejake.
Çdo mëngjes është fytyra e saj që i zë vendin errësirës.
Brenda meje ajo grua ka mbytur një vajzë, brenda meje një plakë
ngrihet drejt saj ditë pas dite si një peshk i tmerrshëm.
Fundi i bashkëbisedimit
Shkruani një mesazh …