THIRRJE PËR NDIHMË
Ah, sikur të isha Marie Curie,
kjo është dëshira më e madhe që kam,
që të mund të llogarisja
radioaktivitetin e zemrës sime,
që të dija
sa dashuri rrezaton ajo
drejt teje.
Ose sikur të isha Neëton,
që të llogarisja
sa është tërheqja
mes zemrës sime dhe tëndes.
Dhe kur të dija të gjitha këto,
do ta thërrisja Don Zhuanin në ndihmë
që të më çonte në udhën
ku tërheqja është më e fuqishme.
NUK DO TË MË BESOSH
Nuk do të më besosh po të të them
se agimet e kuqe janë vetëm pasqyrë e fytyrës sate,
se kjo pranverë erdhi vetëm për ty
dhe se fjalët e tua janë cicërimat më të bukura të zogjve.
Do të mendosh se po të mashtroj,
se po të tregoj përralla siç u tregojnë gjyshet fëmijëve…
Do të qeshësh me pranverën, me erën e me mua,
por nuk do ta kuptosh se faqet e mia,
për shkakun tënd, janë bërë të kuqe.
Nuk do të më besosh po të të them
se jeton thellë e fshehur brenda meje
dhe se sa shumë do të dëshiroja që jeta jote
të bashkohej me timen.
Dhe do të nisesh në një rrugë të panjohur,
në pritje të ndonjë bote të largët,
ndërsa unë do të mbetem vetëm – si një flutur,
e humbur në bar dhe në lule
ËNDËRR
Sonte kam ëndërruar
një ushtri pa armë.
Kam ëndërruar ushtarë
me fytyra të qeshura dhe të gëzuara…
Dhe askund nuk kishte urrejtje
që gëzimin të prishte…
Të gjithë si një,
ushtarë me ngjyrë të ndryshme të lëkurës,
qeshnin me të njëjtat shaka
dhe i shqetësonin të njëjtat brenga…
Kam ëndërruar njerëz
që shkëlqenin nga gëzimi
dhe të bashkuar si milingonat
ecnin përmes jetës…
Dhe askund nuk kishte kufij
dhe asgjë
nuk u qëndronte në rrugë.
Ata njerëz,
me fytyra shumëngjyrëshe,
ecnin me guxim, të përqafuar,
nën të njëjtin pallto…
U zgjova herët.
Në radio – lajmet për luftë.
Oh, sa shumë dua
që ajo ëndërr të më kthehet!
STJEPAN CRNIĆ – TË DHËNA BIOGRAFIKE
Stjepan Crnić, shkrimtar, (Rijeka, 14 janar 1959). Shkollën fillore e ndoqi në Žarovnica, afër Lepoglava, dhe në Špišić-Bukovica, afër Virovitica. Arsimin e vazhdoi në Zagreb, ku pas studimeve në elektroteknikë, përfundoi edhe studimet pasuniversitare në Shkollat e Larta Teknike Ushtarake, duke fituar titullin magjistër i shkencave teknike ushtarake.
Një periudhë kohe është marrë me punë shkencore në fushën e organizimit të punës, përkatësisht mirëmbajtjes teknike dhe furnizimit me materiale.
Me shkrimin e tregimeve dhe poezisë ka filluar të merret që në shkollën fillore. Shkruan romane, tregime të shkurtra, poezi në gjuhën standarde kroate dhe në dialektin kajkav të krahinës Ivanec (Bedenec), poezi haiku, si dhe ese dhe tekste mendimore.
Veprat e tij janë botuar në revista letrare, në stacione radiofonike, si dhe në më shumë se 170 përmbledhje poezish dhe tregimesh të shkurtra në vende të ndryshme. Ka marrë pjesë në shumë recitale poetike dhe në Takimet e shkrimtarëve vendas kroatë.
Ka botuar romanet:
• “Alfa svijet – rodilište” (Bota Alfa – materniteti) (2014),
• “Uskrsni krijes” (Zjarri i Pashkëve) (2018),
• “Kamo smjestiti baku” (Ku ta vendosim gjyshen) (2022, dhe si libër elektronik në 2024);
Novelën:
• “Tajna divljeg kestena” (Sekreti i gështenjës së egër) (2016, dhe si e-libër në 2024);
Mbledhjen poetike:
• “Misli pod zvijezdama” (Mendime nën yje) (2022),
Si dhe librat me ese dhe tekste mendimore:
• “Alfa svijet – život naš vječni” (Bota Alfa – jeta jonë e përjetshme) (e-libër 2021) dhe
• “Alpha and Omega – Our Life in Eternity” (Alfa dhe Omega – Jeta jonë në përjetësi), përkthyer në gjuhën angleze (e-libër 2024).
Për romanet, tregimet e shkurtra, poezinë dhe poezinë haiku ka fituar një numër çmimesh dhe mirënjohjesh.
Romani “Uskrsni krijes”(Zjarri i Pashkëve) (2018), fitoi çmimin letrar Rikard Jorgovanić (2019), i cili jepet nga Shoqata Letrare Kroato-Zagore dhe Komuna Hum na Sutli.
Çmimin e parë për poezi në gjuhën standarde kroate e fitoi në Karlovac (1985), pas së cilës ndoqën edhe çmime të tjera (Zagreb, Gradište afër Županja).
Poezitë në dialektin kajkav kanë fituar çmime në recitalin e poezisë bashkëkohore kajkave “Dragutin Domjanić” në Sv. Ivan Zelina (2023 dhe 2024), si dhe në festivalin e krijimtarisë kajkave për fëmijë dhe të rritur “Pod murvu, na Krče”, në Adamovec (2021).
Ndër çmimet për tregime të shkurtra janë:
• Çmimi i Muzeut të Engjëjve nga Varaždin (2023) dhe
• Çmimi “Turopoljska poculica” (2020),
ndërsa poezia haiku është shpërblyer në:
• Oroslavje (2020) dhe
• Ivanić Grad (2021 dhe 2023).
Është anëtar i Shoqatës Kroate të Shkrimtarëve dhe i Kuvendit Kulturor Kroat.
