1.
Pirueta e lulediellit ,
Homazh
Van Gogut !
2.
Sa rrëqethës
Vaji në pyll
I zogut të vetmuar…
3.
E krisi qiellin
Hiperbola
E vetëtimës…
4.
Dielli mes resh,
Buzëqeshje
Xhokonde…
5.
Pemët pasqyrohen n’ujë;
Zogjtë dhe peshqit
Lozin bashkë…
6.
Lot të stilizuar
Fijet e shelgut
Që shkrehen e derdhen.
7.
Kokrra t’arta bëri
Molla , kur bilbili
Ndër degë i këndoi…
8.
Çfarë sensualiteti !
Lule ,zogj dhe, diell
Që shqyhet gazit…
9.
Kur mjellma këndon ,
Tek vdes,
Liqeni bëhet lot!
10.
Dordolecat n’ara,
Aktorë të trishtë
Tragjikomedish .
11.
Qull pylli nga shiu;
Kërpudhat dolën,
Por s’bënë pranverë…
12.
Dielli djeg;
Nga pemët
Bien fosile gjinkallash…
13.
Çeli pranvera!
Sa e bukur jeta,
Sa i vërtetë amshimi…
14.
Zogu fle në fole,
Te lulja flutura;
Ah,të më pranonin mua !
15,
Si u thur
Ylberi
N’avlëmendin e shiut!
16.
Diellin që u zhyt në det,
Rrekem ta kap
Si Peshkun e Artë !
17.
I kuqi i buzëve
Në tehun e gotës!
Si ike e s’u puthëm ?
18.
I mallëngjyer
Dielli
Në perëndim !
19.
Ylberet mbi ujëvara
Zogj ekzotikë
Që s’kapen…
20.
Krahu i fluturës
Tavaloca n’erë
E piktorit…
21.
Mjellmën mes ujërash
Rri dhe shoh
Si t’ish femër nudo.
22.
Ato plepat, po atje
Presin e presin
Ndanë udhës…
23.
Lepuri n’agim
Mes shkurresh shijon
Luleshtrydhen e diellit…
24.
Gjarpri u zhvesh;
Lëkura e ftohtë
Dhuratë mistike për mozaikun.
25.
Sa shumë polen
Shkundi sonte
Gonxhja e hënës !
26.
Miq , vetëm fëmijët
Ndrisin sa dielli,
Kur qeshin…
27.
Bie një gjethe,
Bie një pendë;
Pema dhe zogu pikëllohen !
28.
Shend e verë
Bajamja
E nusëruar !
29.
Gjelit të egër ngjyrat
Ia mbuloi bora;
Pula iu largua…
30.
Ajo po më çmend, ajo
Reja që bëhet ëngjëll
E më pas djall…
31.
Kjo fole përtokë
Më shqetëson
Sa shtëpia e shembur…
32.
Zot, mbeta këtu,
Në provincën
Tokë !
33.
Zabelin flu era
Shih, kur ta shprishë
Si push lulesh…
34.
Pas pyllit dielli
I kuq dhe i madh
Si zjarr…
35.
Ujëvara e ngrirë
Endërr vere
E ndërprerë…
36.
U rebeluan lulet;
Flutura u bënë
Dhe, fluturuan !
37.
Yjësi e zbritur
Hurmat ndër degë
N’oborrin me mjegull
38.
U vjeshtëzua pylli…
Si ta përballoj
Herbariumin mallëngjyes?
39.
Herbariumi im
Me gjethen e hënës
Në mes…
40.
Lulja që shtriu shiu,
Si femra pas dashurisë
M’e bukur u çua…
41.
Sa herët shtroi bora!
Si të shkel fushës;
Nën prask ka lule…
42.
Tundeni tundeni plepin !
S’e shihni që ka ngecur
Ndër degë hëna ?
43.
Hëna mbi mal
Shih, kur të shkasë
Si ortek i bardhë !
44.
Ndrikullat bletë
Nguten të lidhin
Lulemollën me luleftoin…
45.
Ah, asonanca
E rrjedhës së lumit
Me psherëtimën e pyllit!
46.
Fluturoi
Orkestra
E zogjve…
47.
Bien gjthet,
Rrokjet
E vjeshtës…
48.
Shelgu,
Sensualisht spërdhredhur
Si haiku japonez …
49.
Një janë ,një
Valët e lumit,
Telat e violinës…
50.
Pulëbardha me sqep
Cik cik cipën e ujit;
Me pejza drite e qëndis…
51.
Shiu në zabel
Psherëtimë
E fshehtë…
52.
Ra tablo’ e vjeshtës
E dimrit u var;
Nxin pylli, kodra zbardh…
53.
Bizhuja e hënës mbi liqen
Si e vën‘ me dorë
T’i japë peizazhit klas…
54.
Ikën shirat;
Ylberi mbeti pas,
Dhuratë si Kali i Trojës…
55.
Yjet mbi valë
Ma djegin shpinën
Si kandilë deti …
56.
Lulja mbi pleh,
Predikim pavdekësie
Nga vetë vdekja.
57.
Këtë dimër,
Foletë e zogjve
Pubisin e saj më kujtuan…
58.
Kopsht dimëror me borë,
Ç’magji në prill
T’i çel lulet ?
59.
Ç’zog do të dalë
Nga foleja e hënës
Te plepi ?
60.
Xixëllonjat dashurinë
Me dritë divine shprehin
Mbi pllajën blu…
61.
Turrnakin turtujt
Tremolat e gjetheve ndizen,
Vrujojnë ujërat…
62.
Vjeshtë është në hënë ?
Prandaj shkund gjethe
Mbi lumë ?
63.
Sa i trishtë dreri !
Ah, nga brirët, si drurëve ,
I paskan rënë gjethet…
64.
Vresht’ i nxirë mbi borë,
Vargjet e tu po këndoj
Tek pi verë…
65.
Në fushën me pellgje,
Patat si përrallë zbritën.
Ku është Anderseni ?
66.
Vdiq bilbili dhe ra
Duke kënduar
Gjer në fund.
67.
Vrizon shiu,
Korija vrungullon;
Në qiell pingërima zogjsh…
68.
Korbi s’krrokat,
Si e ngordhur dhelpra;
Gjejeni La Fontenin !
69.
Si më erdhi ndër mend
Në det të hapur
Rrugicë e fëmijërisë…
70.
Nga kopshti me cikna
Njëherësh ikën zogjtë ;
Ç‘zbrazëti e ç’trishtim !
71.
Si dallgë e trazuar
U shkulën nga ujërat
Patat e egra !
72
Dielli ,
Tullumbacja që iu iku
Fëmijëve nga duart.
73
Kalë i zi i zi
Si i shkrumbuar
Nga rrufetë.
74.
Sa i bardhë agu!
Por nata qe e zezë;
S’u ndez llamba e hënës….
75.
Mirazhin e ç’qyteti
Po rrokullisin me rropamë
Bubullimat mes reve?
76.
Vesë e brymëzuar ,
Fruta pylli të brydhëta,
Zogj dimërorë të hutuar…
77.
Heje ngricash dhe myshk
Në pyllin me dritë boreale
Dhe heshtje shurdhuese .
78.
Gjithë jetën do ta ndjek
Rënien e gjetheve
Në vjeshtë.
79.
Borë dhe erë e ngrirë
Por ja, një detaj:
Zogu që fluturon…
80.
Bien gjethet heshturazi;
Së shpejti kështu
Dhe bora do te bjerë…
81.
Të trishta
Fytyrat e lulevjollcave !
Por ç’duan praj meje ?
82.
Me bizhutë e ylberit në gushë
Në ç’pullaz do të ndalë
Pëllumbesha e dashuruar?
83.
Pemë e vetmuar në fushë,
Zog i vetmuar në qiell;
Ku po shkon poeti?
84
Mjellmën që po ulet
Çfarë e krijoi ?
Vallë mjellaza n’ajër?
85.
Du Fu, Du Fu;
Si e mori era arin e vjeshtës
Kështu, dufuuu…
86.
Herët në mëngjes
Zogu dhe dielli
Lozin në të njëjtën degë.
87.
Në luadhin e vesuar
Paskan ardhur
Zogjtë dhe dielli…
88.
Pa shih ;
Zabeli dimëror
Qenka mbushur plot yje.
89.
Fluturzat e borës,
Fluturat e verës qenkan
Zbardhur nga dimri…
- 90.
Tjegull më tjegull
Shtjerr macja
Lëmshin e diellit.
91.
Njera pas tjetrës mjellmat
Futen në liqen;
Dita zbardh…
92.
Nëse do të shkruash
Me pendën e mjellmës,
Ngjyeje në liqen…
93.
Pylli i vjeshtës shkëlqen !
Nxitoni ta shihni;
Ari i tij nxihet shpejt…
94..
Gjethe të kuqe si buzë,
Kujtime puthjesh
N’erë…
95.
Krrokat korbi, bilbili këndon!
Disonancë zemërake ,
Por mua më pëlqen…
Farat me flatra të Haikut
Flu flu fluturuan nga Japonia ,
Mrekullisht për të mbir’ në Shqipëri…
97.
Mimozat, dielli i thërmuar
Vegim pranveror
Në sfond të pyllit të zhveshur …
98.
Mbi gjethet shkel poeti;
Më të bukur se vjeshta
Asnjë tapet s’i shtron dot…
99.
Flak’ n’ajër flamingot !
Thua do të shuhet
Kur të cikë ujërat ?
100.
Sa shpejt e nxin ditën
Pikëllimi i natës
Në dhjetor !
101.
Krizantema të vjeshtës,
Si ju çeli njëherësh
Melankolia !
102.
E xixëlluar fusha ,
Gjelat e egër
Perla vese çukisin…
103.
N’udhën e shkret’
Dielli djeg,
Si djall ndjek…
104
Hëna, frut i pjekur
Shih,si u këput
Dhe,ra n’ujë …
105.
Puthen mjellmat ;
Qafat
Bëjnë zemrën…
106
Yjet,diejt dhe ret’ vërtiten në qiell,
Mbi arat korbat krrokatin grykshëm ;
Van Gogu, i shqetësuar…
