DIELL I ÇORODITUR
Ky diell i çoroditur,
M’i grisi mendimet e më degëdisi larg…
Dikur rrezet e tij ngrohnin qënien time
Edhe pse i rrethuar nga akullnaja…
Deti që më përkëdhelte me dallgë
Tani gulçon fjalë të pakuptimta;
Deri në deje e ndjej tërbimin e tij
Dhe toka po më çahet nga hidhërimi…
LIQENI
Malli paska ngjyrën e pritjes,
Ngjyrën e pritjes në përqafim,
Shtrënguar duarsh buzë liqenit.
Aty valëvitet shpirti im…
Edhe pritja qënka e bukur,
Ashtu si dielli në perëndim.
Petalet e bardha çel zambaku
Liqeni valëvitet në përqafim…
KOHË E PA KOHË…
Më mbyti kjo kohë e pa kohë,
Ky shi që bie me ngashërim,
Mendime të lagura vërtiten
Në qiellin pa ngjyrë,
Ndërsa ajri mpikset në fytyrë.
Dy të moshuar
Rrufisin dhembjen
Në filxhanin e kafesë,
Rrethuar me gulçe gangësterësh.
Qelqi i avullt
Pasqyron portretin tim,
Ndërsa në tokën e lagësht
Dielli mezi mbushet me frymë…
As malet e lartë
Nuk paskan shpëtim
Nga ky rrethim…
- 5. 2023
UJVARË
Si ujvarë vjen
Në ëndrrat e mia,
Më flet për netët e gjata,
Për lumin që avullon
Mbi trupat tanë…
Pastaj me gjeste
Më tregon mëngjeset,
Ditët që marrin frymë
Në buzët e saj qershi
Dhe si vullkan
Në damarët e jetës
Shpërthen pasioni.
Më flet për trillet e saj
Që s’njohin limit…
Unë shoh si shformohet
Nata në agim,
Teksa ajo ikën si harrim.
Dal në rrugë dhe
E kërkoj
Në rrezet e diellit verbues.
Eci kuturu,
Përplasem me njerëz
Që mbi shpinë mbajnë
Rruzullin robërues,
Ndërsa Bota rënkon
Nën ritmin akrepave të orës…
FLLAD PRANVERE
Si fllad pranvere përkundet dëshira.
Një rrugë e gjatë më nis për te ti.
Rend pasioni në viset e pashkelura,
Rend, por nuk arritka dot në Veri…
Si fllad pranvere ike prej meje
Një ditë dimri. Ike në Veri.
Erërat frynin në të miat deje,
Prej qiellit tim nisi të bjerë shi…
Si fllad pranvere në qenien time
Erdhe dhe ike ditës me shi…
Unë, ndrydhur në gjëmime,
Pres agun që të më vijë…
NËNË
Malli për ty
Shkriu dëborën,
Pritja po më rrudh,
Një tufë manushaqe
Syçkat nxorrën,
E unë nxitova t’i puth…
RRUGËTIM
Shiu nuk ia shuan etjen
Tokës që digjet në përvëlim.
As lotët e tu nuk e tretin
Mallin që djeg vetë dashurinë.
Po këtë mbrëmje ku je?
Në ç’rrugë rrugëton.
Po fjalët që m’i the,
Në ç’ëndërr i belbëzon?
Ku janë thyer kristalet,
E syçkave të tu,
Ku është ajo dritë
E qiellit bardh e blu?…
SHËN NAUM
Sa herë
Iki prej teje,
Një copë liqen
Marr me vete.
E mbaj
Në retinën
E syve të mi
Për t’u kthyer
Sërish
Një çast
Tek ti…
DET QIELLOR
Vështrimi yt, det qiellor,
M’u shkri si borë në pranverën e syve,
Si shtangia e trishtë mbetur në dorë
Në hendekun e thellë mes ne të dyve…
Dhe koha ndali ritmin e saj,
Atë çast tërmet ra, e ndjeve dhe ti?
Ishte vjeshtë,
Ëndrrat tona lageshin në shi.
FLUTURA
Tek shëtisja i vetëm
Në qytet të largët,
Një flutur në gjoks më qëndroi.
Krahëshkruara duke rrahur krahët,
Vetminë ma largoi…
MUZG
Kur mbrëmja të vijë e qetë në muzg
E kur dielli të mbyllë synë e zjarrtë,
Atëherë unë dua ëmbël të të puth
Dhe të të përkëdhel me të miat fjalë.
Kur mëngjesi të vijë me pak vesë
E kur dita të çelë ashtu si përherë,
Si toka e zhuritur shiun do të të pres,
Bashkë të nisim udhën në pranverë…
***
Ti lodron e,
ngazëllehesh lumturisht,
Fluturon
Në të tjerë qiej,
Përhumbesh
Përmes kaltërsish,
Hapsirës pafund.
Pastaj kthehesh sërish
Më e lumtur se lumturia,
Strehë gjen
Në ëndrrat e mia…
AGONI
Nuk ka ajër në dhomën e akullt.
Fryma, mbetur pezull po lëngon.
Bota përjashta zvarritet e lagësht
Nën ritmin e shiut monoton…
LLAVË PËRVËLUESE
Tani jemi dy të huaj,
Dy të huaj që ecin
Në kahe të kundërta…
Asnjëherë nuk përballemi
Me diellin.
I shmangemi llavës përvëluese,
Ashtu si pandemisë
Që ka pushtuar rruzullin.
Tani jemi dy të huaj;
Ti në rrugën tënde,
Unë në udhën time,
Nuk mbajmë më maska
Në rrugët tona të gjata,
Veç dielli i dashurisë
S’na bën më me flatra…
PENDESË
Ku t’i çoj tani pendesat e mia,
Fjalët që belbëzonin fshehtas,
Ku t’i çoj puthjet e munguara
Që djegin brenda vetes?
Ku ta çoj mallin që zhurit
Sa herë më shfaqet imazhi,
Gishtat që dridhen në infinit
Mes flokëve të tu ngjyrë ari?!
Ah, të të shihja edhe një herë
Si atë ditë, me sytë e zemrës!
Si i magjepsur do të ta kisha ndjerë
Aromën e flokëve përmes ëndrrës…
