Artisti i mirënjohur prezanton mbi 100 vepra në hotelin Crowne Plaza
Durrësi do të mirëpresë më 25–26 korrik 2026 një nga ngjarjet më të veçanta artistike të kësaj vere. Piktori shqiptar Leonardo Voci, mik dhe bashkëpunëtor i Gazetës Letrare dhe Kulturore “Nacional”, do të çelë ekspozitën e tij personale të artit modern abstrakt në ambientet e hotelit Crowne Plaza Durrës, në Rrugën Taulantia.
Ekspozita do të inaugurohet të shtunën, më 25 korrik, në orën 18:00, duke sjellë për publikun një përvojë të veçantë estetike përmes një “One Man Show”, ku artisti do të prezantojë në rreth 60 minuta universin e tij krijues, të përbërë nga më shumë se 100 vepra të realizuara në frymën e artit modern abstrakt.
Krijimtaria e Leonardo Vocit shquhet për një gjuhë bashkëkohore figurative, ku ngjyra, materia dhe ritmi kompozicional ndërthuren në një dialog të vazhdueshëm me emocionin dhe mendimin estetik. Pikturat e tij nuk synojnë të riprodhojnë realitetin, por ta rikrijojnë atë nëpërmjet abstraksionit, duke ftuar shikuesin në një përjetim të lirë interpretativ dhe në një komunikim të drejtpërdrejtë me energjinë e veprës artistike.
Ekspozita pritet të zgjojë interesin e artdashësve, koleksionistëve, studiuesve të arteve pamore dhe publikut të gjerë, duke u shndërruar në një pikëtakim të rëndësishëm të kulturës vizuale në qytetin e Durrësit gjatë sezonit veror.
Redaksia e Gazetës “Nacional” i uron mikut të saj, artistit Leonardo Voci, suksese në këtë ekspozitë personale, duke vlerësuar kontributin e tij në pasurimin e artit bashkëkohor shqiptar. Veprimtaria e tij dëshmon se arti mbetet një nga gjuhët më universale të komunikimit njerëzor, një hapësirë ku liria krijuese dhe kërkimi estetik bashkohen në shërbim të kulturës dhe të vlerave shpirtërore. Urojmë që kjo ekspozitë të shënojë një tjetër sukses në rrugëtimin artistik të Leonardo Vocit dhe të mirëpritet me interes nga publiku shqiptar dhe vizitorët e shumtë të Durrësit. M.Bucpapa
